Stellenbosser is wêreld se voorste wynmaker

Abrie Beeslaar, keldermeester van Kanonkop, Suid-Afrika se bekende wynlandgoed op Stellenbosch, is pas in Londen vir die tweede keer as die internasionale wynmaker van die jaar tydens die Internasionale Wyn- en Spiritualieë-kompetisie (IWSK) se prysuitdelingsfunksie aangewys. Hy het die titel ook in 2008 verower.

Die IWSK is die wêreld se voorste wyn- en spiritualieë-kompetisie, met oor die 5 500 produkte wat jaarliks deur nagenoeg 50 lande ingeskryf word.

Benewens die trofee vir internasionale wynmaker van die jaar, is Kanonkop op vanjaar se IWSK-geleentheid as die Suid-Afrikaanse produsent van die jaar aangewys asook die wenner van die trofee vir beste pinotage vir die Kanonkop Pinotage 2012.

Wellington Wyne se wynterrein blink uit

Wellington Wyne is sedert 2013 besig om sy merk te maak. Vanjaar het deurlopende gehalte opnuut na vore getree. Hierdie wynmaatskappy in die Wellington distrik se hoofhandelsmerke vir die Suid-Afrikaanse mark is La Cave, Bovlei en Wellington Wyne.
Verskeie wyntoekennings is in 2015 aan Wellington Wyne se produkte toegeken, veral aan die premium La Cave-reeks. ‘n Bewys van deurlopende gehalte uit Wellington se wynterrein.

Geheime van goeie pinotage volgens Abrie Beeslaar

Vir hierdie innemende wynmaker wat onder die pinotage-meester Beyers Truter geleer het wat pinotage nou eintlik is, lê die geheim van ‘n goeie pinotage in baie wyn en min slaap!

“Vir my word pinotage versinnebeeld in die woorde wat bo ons proelokaal geskryf staan: ‘Pinotage is the juice extracted from women’s tongues and lions’ hearts, after having a sufficient quantity of it, one can talk forever and fight the devil’.”

Alto wen goue medalje by The Drinks Business Global Syrah Masters-kompetisie

Alto, die ikoniese rooiwyn-landgoed in Stellenbosch, het pas ’n goue medalje by The Drinks Business Global Syrah Masters-kompetisie vir die 2012 Alto Shiraz gewen.

Die Global Masters Awards is ’n reeks enkel-variëteite wat eksklusief deur wynmeesters, meester-sommeliers en senior wynaankopers geproe word. Daar is nie afsonderlike kategorieë vir elke land nie en anders as die meeste ander kompetisies, word elke wyn bloot op die smaak van die druif en die vaardigheid van die wynmaker beoordeel. Daar word weggedoen met enige vooropgestelde idees oor die belangrikheid van plek, want wyne van regoor die wêreld word net op styl en prys beoordeel. Om goud by hierdie ongelooflike veeleisende en strawwe kompetisie te wen, is een van die top toekennings wat ’n wynmaker kan ontvang.

Wyn-proffie erken vir uitnemende onderrig

Marianne McKay, lektor in wynkunde aan die Universiteit Stellenbosch (US),het erkenning ontvang vir haar besonderse onderrigmetodes. Hierdie lektor in die departement wingerd- en wynkunde

(DWW) ontvang eersdaags die 2015 nasionale toekenning vir uitnemendheid in onderrig. Daardeur erken die raad van hoër onderwys (CHE) en die Suider-Afrikaanse vereniging vir hoër onderwys, leer en onderrig (HELTASA) jaarliks uitnemende onderrig aan Suid-Afrikaanse universiteite.

Onwaarskynlike pasmaats langs die Weskus

Wie sou nou kon dink dat die Weskus een van die lekkerste plekke is om ons land se voorste brandewyne te proe? En dit in ‘n luukse omgewing onder die wakende oog van een van Suid-Afrika se voorste sjefs? Die Weskus is sinoniem met Paternoster, en Paternoster word dikwels in dieselfde asem as kreef gebruik. Brandewyn daarby is dalk ‘n effense onwaarskynlike reisgenoot in hierdie geweste.  

Maar nie as jy saam met die Suid-Afrikaanse Brandewynstigting by die Abalone House aan Reuben Riffel se spesiale brandewyn- en kosparingservaring deelneem nie.