Droë, natuurlik gegiste Mourvèdre rosé wys ‘n ernstige pienk sy

Cape Coral 2015Waterkloof-Wynlandgoed, geleë aan die buitewyke van Somerset-Wes, vier sy dekade van gehalte-wynmaak in harmonie met die natuur met die vrystelling van die 10de oesjaar van sy elegante, droë rosé, Cape Coral 2015.
Hierdie natuurlik gegiste rosé – die pienk trots van die landgoed se gesogte Circumstance-reeks – is gemaak van 100% mourvèdre druiwe en word wêreldwyd beskou as ‘n voorloper vir die meer ernstige styl van rosé wyne. Dit pronk ook tans met ‘n vars, nuwe etiket op sy bottel.

Buiten dat Waterkloof sy manier van boer oor die afgelope dekade handomkeer verander het en sy oorgang van konvensionele boerderymetodes na 'n biodinamiese benadering oor 'n tydperk van tien jaar volbring is, is die geskikte druifvariëteite vir sy spesifieke ligging teen die hange van die Schapenberg ook in oënskou geneem.


“Ons het besluit om eerder die beste variëteite vir die terroir te kies, as om variëteite aan te plant wat in die mark gewild was. Aanvanklik het al die kenners ons afgeraai om mourvèdre op Waterkloof te plant, omdat dit ‘n moeilike variëteit op die verkeerde plek is en glo moeilik verkoop. Vandag is mourvèdre die mees geplante rooiwynvariëteit op die plaas en is ons Cape Coral Rosé ‘n sprekende voorbeeld van uitstekende gehalte,” verduidelik Waterkloof se eienaar, Paul Boutinot.
“Ons glo dat mourvèdre altyd so geplant moet wees dat dit die see kan sien. En dit is presies die geval by Waterkloof waar dit geanker staan in granietgrond, en waar warm somers en die koel seebriese wat oorwaai vanaf Valsbaai indrukwekkende geure en kompleksiteit aan die druiwe verleen. Daar is baie ooreenkomste tussen Waterkloof en Bandol in Provence,” voeg Waterkloof se wynmaker, Nadia Barnard, by.

Die druiwe is met die hand gepluk en tros en al, delikaat gepars om slegs die beste sap te ontgin en te verseker dat die unieke omstandighede, kwaliteit en styl van die spesieke, uitsoekwingerde deurgevoer word tot in die bottel.
Soos met al Waterkloof se wyne, het die 2015-oesjaar berus by spontane fermentasie wat 'n  langer alkoholiese gisting verseker. Die langsame proses is voltooi in ouer stukvate wat `n stadige toename in suurstof toelaat, sonder dat die wyn enige van die eikehout-aromas opneem.

Met sy ligte koraal-pienk blos, flankeer die wyn met delikate blomaromas op die neus terwyl die palet sag, vars en soepel is met  sensuele geure van rooibessies en vars kruie nuanses. ’n Vars natuurlike suurheid dra by tot ‘n skoon, droë nasmaak.
Geniet die wyn koud, net so op sy eie, of bedien dit saam met vars seekos soos kabeljou, geelbek en oesters. Dit proe ook voortreflik saam met Thaise geregte en vars slaaie.