Achim von Arnim – ‘Wyn is ‘n herinnering’
Wyn word nie gemaak nie – dit word geleef. En watter lewe het Achim von Arnimc, stigter van Haute Cabrière in Franschhoek, nie geleef nie. Hierdie ikoon in die Suid-Afrikaanse wynbedryf is hierdie week rustig omring deur sy familie oorlede.
Achim se nalatenskap strek wyd – gebou uit grond, sweet, kreatiwiteit en bowenal ’n liefde vir wyn, kuns, familie en die lewe.
Daar is sommige lewens wat nie bloot ontvou nie – hulle voer jou saam, vang jou verbeelding vas soos ’n bottel wat met ’n sweempie dramatik op ’n goue namiddag oopgemaak word. Die lewe van Achim von Arnim was een van hierdie seldsame verhale. ’n Lewe geleef met groot verbeelding, skalksheid, intuïsie, en die diep wete van hoe om nie net skoonheid te sien nie, maar dit te deel. Wyn, het hy dikwels gesê, is herinnering.
Achim se verhaal het lank voor Haute Cabrière begin. As jong keldermeester het sy tyd by Boschendal die grondslag gelê vir ’n uitstaande loopbaan. Daar het hy een van Suid-Afrika se vroegste tradisionele vonkelwyne gemaak – die tweede Cap Classique in die land, en die eerste Chardonnay-Pinot Noir Cap Classique-v ersnit in Suid-Afrika.
Hy het van die begin af iets oor wyn verstaan wat min mense ooit begryp het – dat wyn ’n kunsvorm kan wees, en dat die land self stories dra wat wag om ontdek te word.
Hy het hierdie soeke na skoonheid oral saamgedra – of hy nou wingerde snoei, poësie skryf, karate beoefen, gewaagde kleurstrepe verf of een van sy geliefde Citroëns met sorg restoureer.
Maar die groot liefdesverhaal van sy lewe het begin toe hy ’n stuk Franschhoek-grond ontdek het wat vir hom aan Frankryk herinner het – van die hellings, die kleigronde en ou wêreldse tradisies wat die wyne gevorm het wat hy die meeste bewonder het. Hy het dit oombliklik herken, soos ’n hereniging met iets wat hy maar altyd gevoel het.
Daardie oomblik het Haute Cabrière se saad geplant, en met die liefdevolle steun van sy rots, sy vrou, Hildegard von Arnim, het ’n droom werklikheid geword. Getroud vir meer as 56 jaar, het Achim en Hildegard ’n toekoms en ’n familie in Franschhoek opgebou. “Die verhaal van Achim en Haute Cabrière gaan nie net oor wyn en sy sprankel nie. Dit gaan oor mense. Dit gaan oor risiko en beloning, oor familie, oor liefde en die strewe na iets groter as jouself,” reflekteer Hildegard.
Hier, onder die Middagkrans-berg, het Achim sy eerste wynreeks by Haute Cabrière laat lewe – die nou-gevierde Pierre Jourdan-reeks. Sy Cap Classiques was ’n huldeblyk aan die vallei se oorspronklike 17de-eeuse Hugenote-eienaar en het die gees van Franse sjampanjes laat weerklink. Met sy kenmerkende flair – half-wetenskaplike, half-towenaar – het hy ’n toekoms verbeel waar Suid-Afrikaanse borrels trots langs die wêreld se beste kon staan.
Tog is een van sy mees ikoniese skeppings nie uit ideale omstandighede gebore nie, maar uit chaos – soos net Achim kon doen. Tydens ’n moeilike oesjaar, toe die druiwe te vinnig vir Cap Classique ryp geword het, het Achim ’n geleentheid gesien. Gegrond in sy oortuiging dat groot wyne in die wingerd gebore word, het hy geneem wat die natuur gegee het en iets heeltemal nuuts geskep. Die Haute Cabrière Chardonnay Pinot Noir was ’n eerste vir Suid-Afrika. ’n Pioniermengsel van elegansie en wonderlike kos-paarmoontlikhede, wat ’n Suid-Afrikaanse ikoon sou word en ’n kenmerk van die landgoed. Uit uitdaging het hy skoonheid geskep – dalk die volmaakste metafoor vir sy lewe.
Want Achim was nie net ’n talentvolle keldermeester nie. Hy was ’n storieverteller, ’n filosoof. ’n kunstenaar, ’n versamelaar van mense en oomblikke. Hy het geglo in lang middae-etes wat uitloop in laat namiddae, in gesprekke wat om die tafel draai soos ou vriende, in die glinsterende ritueel van sabrage asof om te sê: die lewe moet dapper gevier word.
Besoekers onthou die vonkel in sy oog, die gulheid van sy lag, die manier waarop hy jou laat voel het asof die verhaal wat hy vertel net vir jou bestaan. Baie onthou hom die beste deur ’n gedeelde bottel, ’n gedeelde oomblik, ’n gedeelde gevoel van verwondering.
Sy kreatiwiteit het oral geleef – in die wingerde, in sy kelder-vernuwings, in sy gedigte, in sy kuns, en in die wyse waarop hy en Hildegard hul vier kinders grootgemaak het: Takuan, Zoë, Tanja en Tamo. Sedert hul aftrede is die landgoed trots in sy kinders se hande: Tanja von Arnim, nou uitvoerende hoof, en Takuan von Arnim as wynmeester. Zoë von Arnim dra die familie-nalatenskap in België voort en voer Haute Cabrière-wyne na Achim se geliefde Europa uit. Saam dra sy familie en die span sy visie, sy waardes, sy eerbied vir die land en die handwerk, en sy onwrikbare geloof dat wyn en skoonheid mense in oomblikke van vreugde kan saambring.
Die wynbedryf en almal wat hom geken het, eer ’n man wat geleef het soos hy geskep het – passievol, speels, vreesloos. ’n Man wat mense wêreldwyd geleer het dat skoonheid in eenvoud lê, en dat vreugde vermenigvuldig wanneer dit gedeel word.