SAWIPB nou selfstandige entiteit
Die South African Wine Industry Professional Body (SAWIPB) het onlangs ‘n belangrike mylpaal bereik deur as ’n nie-winsgewende maatskappy met ’n nuwe beheerstruktuur te registreer, wat dit bemagtig om professionele persone in die wynbedryf te benoem. Dit is ’n deurslaggewende stap in die ontwikkeling van SAWIPB, wat nou as ’n selfstandige entiteit funksioneer. South Africa Wine is steeds primêre lid en sleutelfinansierder.
Die nuut aangestelde direksie vir SAWIPB sluit ’n diverse groep leiers in met ’n magdom ervaring en insig. Barend Jordaan van Cape Wine Exporters, Denise Stubbs van Thokozani, Denzel Swarts van Zoetendal, Rydal Jaftha van Koopmanskloof, Celeste le Roux van React24, en Nadia Hefer van Hive Collective beklee almal sleutelrolle. Hul kollektiewe kundigheid oor verskillende sektore van die wynbedryf sal SAWIPB help in die missie om professionele standaarde te verhoog én voortgesette groei en wêreldwye erkenning vir SuidAfrikaanse wyn te dryf.
Die kern van SAWIPB se missie is die vooruitgang van die wynbedryf deur die bevordering van kennis, die beskerming van verbruikersbelange en die verhoging van professionele standaarde. Deur te verseker dat sy lede aan ’n vasgestelde standaard van uitnemendheid voldoen, bevorder SAWIPB ’n kultuur van voortdurende verbetering wat noodsaaklik is vir die handhawing van Suid-Afrikaanse wyne se wêreldwye reputasie.
Onder Kachné Ross se toegewyde leierskap is SAWIPB ’n professionele liggaam wat daarop gemik is om beroepe en kennisoordrag binne die wynbedryf te bevorder en die belange van werkgewers en die publiek te beskerm.
Die entiteit:
• bevorder en bou voort op die professionele status van lede en erken die kundigheid van diegene wat dit verteenwoordig,
• werk saam met opleidingsliggame en tersiêre instellings om te verseker dat kwalifikasies ooreenstem met die vaardighede wat in die bedryf benodig word,
• voorsien ’n forum vir netwerkvorming wat die uitruil van inligting en idees tussen professionele persone in die bedryf vergemaklik,
• ontwikkel modelle van beste praktyke wat oor die hele sektor aangeneem kan word, en
• bied deurlopende professionele ontwikkelingsgeleenthede aan om lede te help om aan te hou groei en sukses te behaal.
Met hierdie nuwe struktuur is SAWIPB beter toegerus as ooit om sy missie te vervul, en bied lede ’n duidelike pad na erkenning, ontwikkeling en professionele uitnemendheid. Die volgende stap vir SAWIPB is om registrasie by die Suid-Afrikaanse Kwalifikasie-owerheid (SAQA) te voltooi om mense aan te wys om oor die verskillende dele van die waardeketting te werk. South Africa Wine se ondersteuning vir SAWIPB spruit uit ’n gedeelde verbintenis om die kwaliteit en reputasie van Suid-Afrikaanse wyne internasionaal te verhoog.
“Deur hierdie onafhanklike liggaam te steun, belê ons in die bedryf se toekoms en verseker dat dit floreer deur ’n sterk grondslag van bekwame en erkende professionele persone,” sê Rico Basson, uitvoerende hoof van South Africa Wine.
“Ons moedig alle professionele persone in die bedryf, affiliasies en opleidingsdiensverskaffers aan om by SAWIPB by www.sawipb.co.za aan te sluit,” sê Ross.
“Om ’n lid te word, bied waardevolle geleenthede vir groei en ontwikkeling en posisioneer jou aan die voorpunt van ’n bedryf wat toenemend erken word vir uitnemendheid. Kom ons bou saam ’n beter toekoms vir Suid-Afrikaanse wyn.”